WILLEMSTAD.- Den e fin di siman ku a pasa, pa ta mas eksakto djadumingu, un biaha mas Kunuku Man i su tim a akudí na un sitio ku tin mester di atenshon i un biaha mas nan a piki shushi dje porkonan ku ta bisa ku nan stima e lugá aki. Pero Kunuku Man no ta entregá, i e biaha aki  e grupo a bai na playa di Caracasbaai unda hopi di nos hendenan ta bai sosialisá diariamente i prinsipalmente den wikènt.

Hopi ta esnan ku ta kumpli nèchi i sea nan ta bai kas ku nan shushi òf ta deponé esaki den kliko i drùmsnan ku tin poné na e playa. Pero tin un grupo ku simplemente tin un parti di edukashon a bai laga nan i komo tal ta tira bòter i otro ophetonan riba kaya i den mondi. Na e sitio aki e grupo a rekohé un total di 357 kilo di shushi. A bai ku no ménos ku 1.310 bòter di serbes, bon pa 262 kilo, kual a bai pa banko di glas; 300 bleki di aluminio, bon pa 4 kilo, ku a bai pa resiklahe; tambe 500 bòter di plèstik, bon pa 10 kilo, i demas artefaktonan di plèstik, pa 7 kilo mas, kual a bai pa resiklahe. E demas 74 kilo a bai tirá na landfill.