Update: Playanan ta responsabilidat di LVV

EXTRA a buska kontakto ku Ofisina di Turismo pa wak si akaso CTB ta mantene playanan publiko ainda. Bosero di CTB a splika ku e playanan no ta bou di maneho di CTB i awor aki CTB no tin niun plan pa kontrolá, mantene i manehá playanan publiko. EXTRA ta sigui buska kontakto ku e parti di ministerio GMN ku ta atendé LVV.

WILLEMSTAD.-Esaki ta e situashon di e playa na Caracasbaai. Un laman masha bunita i dushi, no solamente pa esnan ku ke landa pero tambe e ta sumamente bunita pa esnan ku ke disfrutá di e bista. Ta un playa unda tantu hende lokal komo ekstranhero ta disfrutá engrande. Despues di un wikènt kaminda hendenan a disfrutá di e área publiko sin nodi di paga nada, pasobra ta un plaka publiko, a lanta ku vários kibrá. Hopi lamentabel.

Opviamente no ta un situashon di un dia ni tampoko un wikènt. Por mira ku tin banki bou di e palapanan ku ta wantá ku un blòki i otronan ta te abou na suela. Ta hopi urgente i nesesario pa drecha e bankinan pasobra ta un área publiko sumamente bunita di Kòrsou. E fotonan ta ilustrá ku ta praktikamente tur banki ta den un estado deplorabel. Playanan publiko di Kòrsou ta responsabilidat di LVV pero den pasado resien a buska kolaborashon ku Ofisina di Turismo pa duna un man ora ta trata di e playanan publiko unda tin hopi konsentrashon di publiko lokal kombiná ku turista. Esaki sigur ta un di e playanan unda e turista por kompartí ku e publiko lokal. Por mira esei na Kenepa grandi, otro beyesa di playa di Kòrsou.

EXTRA hopi bia ta pasa den e área i ta nota ku tantu den siman komo wikènt tin hopi moveshon den e área. Famianan ta bai selebrá tur klase di aktividat.

No tabata posibel haña un informashon konkreto si tin un skema di mantenshon pa loke ta trata bankinan i palapa. E parti di limpiesa ta keda un reto i hopi bia ta boluntarionan ta yuda limpia e playa pasobra esnan ku hasi fiesta den mayoria kaso no ta laga e lugá limpi. Un di e reklamonan ta keda e echo ku na lugá di pieda i santu di laman ta topa wesu di galiña, pòrkchòp i spareribs. EXTRA ta spera ku por drecha e bankinan pronto i bini un otro sistema pa generá fondo, pa asina por garantisa mantenshon i limpiesa na un manera adekuá. Lamentablemente e manera ku a bai te awor no ta funshoná.