WILLEMSTAD.- Ta hopi tristu pa tuma nota kon un área asina bunita, por a para bira un porkeria. I e porkeria aki ta nos mes ku ta bishitá e playa aki a okashoná. EXTRA ta referí na e playa públiko ku ta karga e nòmber di Sonesta.
Ta tur ora por tende gruponan ta reklamá ora gobièrnu ke duna sierto playa na personanan privá. Klaro nos tur ke pa e playanan aki keda habrí i aksesibel pòrnada pa públiko. Pero ta asina aki nos ke pa e playa públiko, liber, pòrnada pa nos bishitá ta?
Ayera nos a bishita e playa públiko na Sonesta i e situashon ta unu di yora. Hopi sushi, sushinan ku a keda atras di bishitantenan di e playa mes, sushinan despues di un dia masha dushi ku komementu i bebementu pero e porkeria a keda atras.
EXTRA a bai buska informashon di e playa kai i nos a komprondé ku tin un maneho na gobièrnu aktualmente pa pasa 9 playa den man di CTB. Pero e plan pa un motibu òf otro ta wanta.
Loke si nos a komprondé ta ku na 2012 e tempu ei minister Charles Cooper a duna propietario di ITC maneho riba e playa ei, ku vários kondishon mará na dje. Entre otro EXTRA a komprondé ku mester a sòru pa su limpiesa. Kon e kumplimentu di e kondishonnan a bai ta un pregunta ku ta kontesta pa su mes ora mira e porkeria ku tin na e playa aki.
EXTRA a komprondé ku hotèl Clarion ta risibí gruponan grandi di en partikular kolombiano ku regularidat i tur ta basha na bòshi bai landa na e playa públiko di Sonesta. I ta e porkeria aki nan ta topa!
Pero ta bin aserka ku na mart 2017 tempu minister Rhuggenaath tabata enkargá ku turismo a yega na un plan ku a keda asta aprobá den konseho di minister ku asta dekreto pa duna CTB 9 playa ku lo sòru pa trabou pa 750 hende. Pero e plan aki a keda mal stanka den lachi un kaminda serka un minister.
Ta urgente pa gobièrnu tuma nota di e situashon no solamente na e playa públiko di Sonesta pero tin mas playa públiko ku ta pasando den e mesun situashon. Si nos boka ta yen di turismo, anto a yega ora pa dun'é kontenido real; pone atenshon na nos playanan.