WILLEMSTAD - Siman pasá Algemeen Pensioenfonds van Curaçao -APC- i Heritage Plaza Consortium -HPC- a organisá diferente seshon den teatro Luna Blou, kaminda a hiba diferente kòmbersashon ku diferente partido importante relashoná ku e desaroyo di e área di Plaza. Meta di e siman aki tabata pa risibí mas tantu aporte posibel di ekspertonan di e diferente sektornan aki na Kòrsou i asina krea un base di sosten pa e proyekto. E área di Plaza mester kontribuí na e urbanisashon di Punda ku un programa multifunshonal atraktivo kaminda bibienda, horeca, kultura, edukashon, incubators i rekreashon lo risibí nan lugá debidamente. E ambishonnan ta haltu i tin hopi reto relashoná ku rekonstrukshon di e área di Plaza pero e proyekto aki tambe ta ofresé oportunidatnan bunita. E desaroyo di Plaza ta muchu mas ku un proyekto di bienes raises. E ta un katalisadó pa reforsá e posishon sosio ekonómiko di Punda i Kòrsou. Den edishon di EXTRA mayan lo tin un relato mas amplio.