...Momentu ku outoridatnan a detené e sospechoso na Mahuma Kaya O...

WILLEMSTAD.- Ayera mainta tempran komunidat di Kòrsou a keda di shòk pa asesinato di Almier Godett. Di shòk pasombra no solamente Almier ta subrino dje polítiko i eks-promé minister di Kòrsou respektivamente sr. Anthony Godett i Mirna Louisa-Godett, pero p’e echo ku e tabata un kandidato riba un partido polítiko Trabou pa Kòrsou, kual partido ta partisipá dia 19 di mart próksimo na elekshon 2021. E tabata kandidato number 4 riba e lista.
Segun e informe di polis ta bisa ku djadumingu 7 di mart 2021 alrededor di 08.20 or, Sentral di Polis a risibí informashon di un pleitamentu serio ku tabata tumando lugá na un adrès na Juan Domingo bij Mahuma. Mesora a dirigí un unidat na e sitio.
Djis un ratu despues a drenta otro informashon ku na e mesun adrès aki abitantenan a
tende vários tiru, pa despues tuma nota di un hòmber ku a bin kai abou heridá den kurá di e kas.
Na yegada di e unidat nan a bin topa en bèrdat un hòmber drumí den e kurá ku vários
herida di bala na su kurpa. Mesora a pidi presensia di ambulans, ku na nan yegada no por a hasi nada mas pa e víktima. Ta trata di e hòmber Almier Godett, nasé na Kòrsou dia 26 di sèptèmber 1982.
Kontinuando ku e investigashon, polis a bai na un adrès den Mahuma Kaya O, na unda a bin topa diferente kashi di bala ku a keda konfiská. Deskonosínan lo a bai na kas dje agresor i a basha bala riba e kas. Na e mesun kas na Mahuma Kaya O, outoridatnan a detené alrededor di 09.00 or e hòmber sospechoso M.M.M. di 36 aña di edat nasé na Kòrsou, pa e kaso di asesinato ariba menshoná.
Mas despues, alrededor di 10.30 or, polis a detené na e promé sitio di insidente, esta Juan Domingo bij Mahuma, e hòmber sospechoso S.S.G. di 33 aña di edat nasé na Kòrsou, pa destrukshon.
A presentá ámbos sospechoso dilanti di un fiskal ouksiliar ku a ordená nan enkarselamentu
pendiente di mas investigashon. Informashon no ofisial ku EXTRA tin ta indiká ku e víktima lo a bai pa plakia un problema familiar na e sitio en kuestion. E momentu ei e agresor tambe a yega i a saka arma di kandela i por bisa praktikamente a basha bala riba Godett, ku a fayesé mesora na e sitio. EXTRA ta ekstendé palabra di kondolensia na famia dje defuntu.