WILLEMSTAD.- E diskushon no ta bai pa kiko kua minister a hasi òf laga di hasi den pasado. Den último 8 aña ta tur partido tabata forma parti di gobièrnu na un momento òf otro. Ta bai si pa e echo ku for di 2013 no a subi e penshun di behes. Asina kolaboradó di partido MAN-PIN, Yaël Plet ta deklará.

E ta mustra ku último 3 aña tabatin kresementu ekonómiko real na Kòrsou i ku konforme e lei di aov (penshun di behes) mester a indeksá esaki. “E indeksashon no a tuma lugá sinembargo i ainda e penshun di behes ta na 862 florin pa luna.” P’esei e ta bisa ku ta warda e minister di Desaroyo Sosial, Labor i Bienestar, Charetti America-Francisca indeksá e penshun pa medio di un dekreto.

Segun Plet tur hende ta di akuerdo ku mester indeksá e aov. “Mihó lat ku nunka. Diskutí riba kiko ken a hasi òf laga di hasi den pasado no ta yuda e penshonado ku nada.”

Plet ta sigui bisa ku frakshon di MAN-PIN, ta invitá minister America-Francisca pa krusa e brùg aki huntu na bienestar di penshonadonan. “MAN-PIN ta sostené e minister den esaki. Meskos ku ora e bini ku inisiativanan pa kambia Lei di Bion i kambia lei di suèldu mínimo na interes di trahadónan, ban pa hasi e kambio aki tambe na interes di penshonadonan i ban pone kabes huntu pa hasi e kambio den lei na interes di penshonadonan.”

Den e kuadro aki Plet ta referí alabes na e inisiativa di lei di frakshon di MAN-PIN a entregá pa kambia e lei di aov di tal forma ku e penshun ta subi pareu ku oumento di kosto di bida. MAN-PIN ta proponé den e inisiativa aki pa bai bèk na e situashon di ántes kaminda ta disidí ku ta indeksá penshun di behes a base di e sifra di inflashon. “Banda di ta spera akshon pronto i konkreto di minister di Finansa pa indeksá e penshun di behes pa asina e penshonado keda ku mas sèn den su saku, ta laga e inisiativa di lei kana su kaminda i introdusí.”

Plet: “Den polítika ora tur hende ta di akuerdo riba algu, mester pone kabesnan huntu na interes di komunidat. Manera mi a bisa kaba no tin sentido pa keda diskutí riba kiko ken a hasi òf laga di hasi den pasado.”

Foto:

...Yaël Plet...