Otro siman ta bai Merka i Inglatera

WILLEMSTAD.- Konforme e planifikashon, Project Management Organization (PMO), enkargá ku e búskeda pa un partner stratégiko pa Refineria Isla despues di 2019, ta kuminsá reuní ku potensial partnernan ku a mustra interes pa manehá, operá i modernisá e refineria unabes e kontrakt aktual terminá. For di otro siman miembronan di PMO lo bai, den dos diferente delegashon chikí, tantu na Merka komo na Inglatera pa kuminsá papia ku partidonan ku a  demonstrá interes den e refineria di Kòrsou. Esaki ta e promé grupo di interesadonan ku PMO lo bishita i hiba kombersashon kuné.  Meskos lo hasi ku tur otro partidonan ku ta mustra di tin e potensial pa ta un partner pa nos refineria.

E bishita di PMO na e diferente kompanianan ta bin despues ku RdK a manda inventarisá interes serka alrededor di 50 kompania te kon leu nan tin interes den un kontrato di mas aña pa manehá i operá Refineria Isla. Miéntras ku ainda e reakshonnan ta drenta, PMO konforme su asina yamá “roadmap” ku e ta kana pa yega na e partner stratégiko, ta kuminsá ku su buèlta di bishita na e empresanan ku ya kaba a demonstrá interes. Den esaki ta trata di atendé e búskeda den un forma mas efisiente (dor di bishitanan simultáneo), pero tambe na forma transparente (esta ku mas miembro ta asistí den un delegashon chikí na un kombersashon.)  Ta spera ku pa fin di e luna aki por yega na un lista kòrtiku di esnan interesá.

Esnan selektá lo keda invitá pa bishitá e instalashonnan di e refineria i hasi un asina yamá “Due Dilegence” den luna di mei i yüni próksimo. E kompanianan durante yüli mester entregá un oferta.  Durante di e bishitanan na  e diferente kompanianan: lo sigui sondia  tambe e interes pa un entrada mas trempan den operashon di nos refineria.

Pago di salario

RdK entretantu a sigui ku su esfuersonan, huntu ku e aktual operadó, Refineria Isla, pa na promé lugá reanudá operashon di e refineria i na di dos lugá, pero no ménos importante, purba generá entrada pa pago di salario di empleadonan ku ta traha den Isla. RdK,  banda di esaki, ta inventarisando vários otro trayekto pa reanudá e proseso di refinamentu.  Ta importante suprayá si ku suministro di krudo ta keda e faktor mas determinante pa e refineria por drai atrobe.  Bal enfatisá tambe ku ta Refineria  Isla, komo e operadó, ta esun responsabel pa perkurá pa su krudo yega i keda refiná òf ku e ta sera un akuerdo ku tersero pa suministro di krudo i despacho di produkto, asina yamá “tolling deal.”