Segun KEM

WILLEMSTAD.- Frakshon di Partido Nashonal di Pueblo (PNP) ta trese tardansa innesesario den e proseso pa aprobá e kambionan pa eliminá e lei ku ta kòrta ku 12,5 porshento den kondishon laboral di ámtenarnan i personal dosente. Asina parlamentario pa KEM, Anthony Godett ta trese dilanti. El a vosiferá su opinion durante reunion di Komishon Sentral di parlamento djaluna último.

Durante e reunion a trata e kambionan den lei ku gobièrnu a manda parlamento despues di a yega na un kombenio ku gremio sindikal. Ta trata di 2 kambio esta ku ta eliminá e lei i ku ta hasi esaki ku forsa retroaktivo ta promé di yanüari 2024.

Frakshon di KEM meskos ku otro frakshonnan den parlamento a sali for di e punto di bista ku parlamento lo a bai di akuerdo ku un “blanco verslag” di e tratamentu den Komishon Sentral di e lei. Esaki lo a aselerá e proseso pa pone e kambionan di lei na tratamentu den reunion públiko i den e reunion aki e frakshonnan lo a trese nan puntonan dilanti i eventual pregunta ku e minister konserní lo kontestá durante e reunion.

Presidente di parlamento, Gilbert Doran a bisa ku ta intenshon pa e siman aki mes yama e reunion públiko pa pasa e kambionan. Di e forma aki lo publiká e lei na tempu pa 18 desèmber awor e ámtenarnan lo kobra e salario indeksá ku forsa retroaktivo te promé di yanüari 2024 i e diferensia di “loontrede” pa e periodo di yanüari te ku desèmber 2024

Pero KEM a tuma nota ku miembro di parlamento pa PNP a elaborá bastante riba e lei hasiendo preguntanan na e minister. Esaki segun Godett ta pone un preshon innesesario riba no solamente griffie di Staten pa trata un relato di e reunion ku e preguntanan, pero tambe riba minister pa kontestá e preguntanan.

Na su opinion ta trata aki di otro táktika di PNP pa tarda prosesonan meskos ku e partido a hasi ku e plan pa re konektá kasnan riba awa ku koriente atrobe. “Ministernan di PNP a pleita bou di otro i e plan a resultá den lachi sin ku a ehekutá esaki”, Godett ta bisa. E ta mustra alabes ku ta na interes di penshonadonan pa kaba di atendé e parti aki pa asina por atendé ku nan parti pa kobra indeksashon

Mas aleu Godett ta mustra ku den e reunionnan di parlamento ta hiba hopi diskushon riba asuntunan ku no tin di aber ku e tópiko di e reunion. “Esaki ta kosta tempu i ta hasi e reunionnan inefisiente. E kos aki mester stòp. Mester hiba debatenan al kaso pa atendé asuntunan ku ta na bienestar di komunidat.”

Entretantu griffie traha e relato di e reunion di Komishon Sentral ku ta bai pa gobièrnu pa kontesta e preguntanan por eskrito. Durante e diskushonnan den Komishon Sentral, parlamentario pa PNP, Sheldry Osepa a trese dilanti ku ta su trabou e ta hasi komo parlamentario, esta di papia i trese su puntonan dilanti u hasi pregunta si e ta haña ku esakinan ta nesesario.

Foto:

...Anthony Godett...