WILLEMSTAD.- “Mi ta sinti mi kontentu ku mi ta na kas bèk.” Asina Henny Reinilia a bisa den un promé reakshon pa EXTRA relashoná ku e ta bèk den seno di partido Nashonal.

Despues di tabata riba lista di kandidato di partido Kòrsou di Nos Tur na 2021, Reinilia a regresá siman pasá ofisialmente den seno di e tolda bèrdè. Partido a risibí su “yu pèrdí” ku man habrí atrobe i Reinilia mes ta bisa di a keda hopi kontentu ku e resepshon.

Komo èks presidente i miembro di parlamento pa partido Nashonal, Reinilia konforme statutonan semper a keda forma parti  di e konseho di partido. E ta splika tambe ku apesar ku el a paresé riba un lista di kandidato di un otro partido, nunka el a entregá retiro ofisial na partido Nashonal.

E mes ta deskribí su akto komo unu di un yu ku a rebeldiá i bai for di kas di su mayornan, pero ku e realidat ta ku su kurason semper a keda ku su famia. “A pidi mi un karta ofisial ku mi no ta afiliá mas na partido Kòrsou di Nos Tur.”

Despues di a regla e partinan ofisial aki Reinilia a presentá den reunion di konseho di partido siman pasá djaweps kaminda a yam’é wèlkòm bou di aplouso di esnan den sala. E regreso di Reinilia den filanan di e partido ta kuadra ku esfuersonan ku ta hasiendo pa trese tur “Nashonalista” bèk kas.

Reinilia ta bisa ku el a risibí hopi komentario positivo tantu di hendenan paden di partido komo pafó manera bisiña, konosínan i miembronan di hopi aña. Reinilia ta bisa ku su meta ta pa duna un man i yuda ku e hopi trabounan ku mester tuma lugá i ta bisa ku den un aña promé ku elekshon semper e trabounan ta hopi.

Un di e trabounan aki ta entre otro pa sigui trese mas “Nashonalista” kas bèk. Tambe Reinilia ta bisa di lo duna un man pa sigui saka partido dilanti di forma positivo.

Pa logra esaki e ta kere ku mester sigui traha riba union. “Tin logronan positivo di ministernan di Nashonal. Mester pone mas atenshon na esakinan i huntu ku e trabou duru ku parlamentarionan i henter partido ta hasiendo”, Reinilia ta deklará.

Na su opinion no mester laga kosnan chikitu ménos positivo dominá den publisidat. Un punto spesífiko ku Reinilia a referí na dje ta komentario ku por tende ku partido Nashonal ta “antikuá”.

“Ami lo no bisa asina, esta ku partido ta antikuá. Partido Nashonal ta para pa òrdu, desensia i disiplina ku ta puntonan ku generashonnan mas hóben no ke rekonosé mas.”

Den e kuadro aki Reinilia ta bisa ku tin diferente partido kaminda situashon interno ta un “free for all” tin i ku e situashon ta birando un káos. E ta ripará esaki no solamente na Kòrsou, pero tambe den eksterior i ta mustra na e efekto ku populistanan manera Donald Trump i Geert Wilders tin na Merka i Hulanda kaminda polítikamente kosnan ta birando un káos.

“Si bo mantené bo na fundeshi i filosofia di partido bo ta evitá e tipo di situashonnan aki i huntu ku e generashon mas hóben mester wak kon ta modernisá un ke otro. Pero, mester duna e hóbennan si e formashon pa asina wak kon denter di e òrdu, desensia i disiplina aki ta modernisá e kosnan.”