WILLEMSTAD. - Poder di eskoho ta un poder ku kada persona tin pa hasi eskohonan pa nan presente i nan futuro. Konsiente di esaki, Nilda Pinto SBO Suffisant a traha un video pa nos studiantenan ku a pasa den klas di mèntòr, kaminda 2 eks-studiante i tambe 2 persona konosí di komunidat a laga studiantenan mira un tiki den nan bida- unda nan tabata, kon nan a hasi uso di e poder ku nan tabatin pa skohe i ku awe nan por ta kaminda nan ta.

Mirando e impakto di esaki, Nilda Pinto SBO a kompartí esaki ku pueblo di Kòrsou riba nan página di Facebook  Nilda Pinto SBO Suffisant. Un invitashon ta bai na pueblo di Kòrsou kompleto pa bishitá e página di wèp pa por disfrutá di e tremendo video di konsientisashon akí.

Na mes momentu ta bai un invitashon na tur hóben entre 16 pa 24 aña ku no tin diploma ainda pa inskribí serka nan pa por start yanüari ku preparashon pa Bo diploma den bo man.  Bo por hasi esaki via nos link:  https://forms.office.com/r/YP3CP4Skau òf por tene kontakto ku nos na number di telefòn: 868-5206.

Kòrda: Edukashon, niun hende por kita for di bo, pues skohe konsiente, ta e poder ku bo tin. Pa loke ta trata Nila Pinto SBO Suffisant, nos t’ei pa sirbí bo.