WILLEMSTAD.- Polis awe a deskubrí vehíkulo ku ladronnan a usa pa kiebro den edifisio Uptown den Breedestraat na Punda. E vèn a keda lokalisá riba tereno na Veeris. E ta trata di un Suzuki di e kompania di èrko Lennox. Pega na e porta di e outo, kaminda ladronnan a move ku e merkansia ku nan a hòrta for di Uptown, a keda un pida di un ganchu (‘hanger’) atras.

Polis a laga un kran kue e vehíkulo i hib’e na warda di polis pa mas investigashon.
Manera ta konosí, pakus Uptown den kaya grandi di Punda awe mainta trempan a bira víktima di ladronisia kombiná ku destrukshon formal. A kibra glasnan pa asina por drenta i hòrta paña.
Tabata mas o ménos 4’or di mardugá ku un vèn a kore yega na e sitio i algun tipo a baha afó armá ku mukel grandi nan a kibra e showcase. Nan a bai ku hopi paña di marka. Awor polis a deskubrí e vèn ku e ladronnan a usa.