Update

WILLEMSTAD – Tabata ayera mas den oranan di anochi ku e hóben shofùr di 21 aña di edat ku tabata involukrá den e aksidente fatal riba Schottegatweg Noord a keda pone den libertat. Despues di interogashon di parti fiskal ouksiliar e por a bai kas pendiente mas investigashon. Miéntras tantu tambe polis a duna informashon ofisial tambe di e dos víktimanan. E dos personanan ku a fayesé den e aksidente di djasabra 20 di ougùstùs 2022 riba Schottegatweg-Noord, a keda identifiká komo:
Emmanuel C. Martina, nase na Kòrsou dia 19 di aprel 1954;
Chrisphonte Decopin nase na Haiti dia 20 di febrüari 1969.

WILLEMSTAD – Awe den ora lat di mainta un aksidente horibel a tuma lugá ku a kosta bida di dos persona. Segun vershon preliminar di bosero polisial, Imro Zwerwer atrobe un aksidente pa motibu di velosidat haltu. Polis mesora a konfirmá detenshon di e shofùr inisial D.D.K 21 aña di edat. Djasabra den oranan tempran di anochi polis a laga e hòmber den libertat atrobe. Polis ta sigui ku e investigashon. Pendiente investigashon K. tin ku keda na disponibilidat di polis.
Konfirma pa Zwerwer dos persona ku tabata traha i hasi limpiesa riba Schottegatweg Noord a keda alkansá pa un outo ku a pèrdè kontrol. E impakto tabata asina grandi ku ámbos víktima a bai kai den e kura ku por sierto un muraya haltu. Vários ta e polis nan ku a yega pa hasi e investigashonnan nesesario i a tene e kaya sera. Forsa na famianan di e víktima nan.

Vershon ofisial di polis:
Djasabra 20 di ougùstùs 2022 alrededor di 11.04’or, Sentral di Polis a risibí informashon di un aksidente bastante grave ku a tuma lugá riba Schottegatweg-Noord algu despues di Beatrixlaan.
For di investigashon preliminar a sali na kla ku un outo di famia tabata kore riba Schottegatweg-Noord den direkshon di Biesheuvel.
Shofùr di e vehíkulo aki dado momentu a pèrdè kontrol riba su stür i bai dal kontra di un pikòp ku tabata stashoná kantu di kaminda i tambe dos persona ku tabata hasi trabounan di limpiesa kantu di kaya.
E impakto tabata asina fuerte ku e outo aki a hisa e dos víktimanan i benta nan over di un muraya di kurá di un kas na man drechi di kaminda.
Tur dos víktima di sekso maskulino a fayesé na e sitio di e aksidente.
Investigashon den e kaso aki ta kontinuá