WILLEMSTAD - Kuerpo polisial a emiti un komunikado ofisial den kual nan ta identifika un di e viktimanan di e dobel asesinato ayera. Tabata djasabra 9 di febrüari alrededor di 19.15’or, Sentral di Polis a risibí yamada di un kaso di tiramentu ku tabata tumando lugá riba Koraalspechtweg.
Mesora a dirigí diferente unidat na e sitio.
Na yegada di e promé unidatnan, nan a bin topa dos hòmber drumi abou kantu di kaya, ku diferente herida di bala na nan kurpa.

Un vehíkulo den besindario tambe a risibí perforashon di bala.
Inmediatamente a pidi presensia di ambulans, pero na nan yegada, no por a hasi nada mas pa e dos víktimanan.
Dòkter di polis ku a yega na e sitio a konstatá morto di e dos hòmbernan.
Un di e víktimanan a keda identifiká komo Signald Dionisio Richart Quammie, nase na Kòrsou dia 27 di aprel 2001.
E otro víktima su identidat te ainda no ta konosí pa polis, miéntras ta kontinuando ku e investigashon pa sa kiko a sosodé ku a kondusí na morto di e dos víktimanan aki.
Un súplika ta bai na tur siudadano ku tin informashon tokante di loke a tuma lugá relashoná ku e kaso aki, pa tuma kontakto ku polis na 917 òf e liña anónimo 108.

https://extra.cw/likidashon-den-koraal-specht-ku-2-morto/