WILLEMSTAD.- Despues di algun siman di búskeda, porfin polis a logra pone man riba e último di e grupo di tres sospechoso ku polisnan tabata buska pa kasonan pisá kometé.

Anteriormente a saka un komunikado pidiendo komunidat koperashon pa búskeda di e tres sospechosonan. A logra detené dos kaba, i ayera  e sospechoso Jermaine Marcelo SINTJACOBA (alias Chamo) nasé na Kòrsou, 16 di febrüari 1985 i bibá na Kaya Áwaseru 5 a keda detené. Jermaine ta enbolbí den e kaso di hinkamentu ku morto na Veeris.

Riba e fecha 22 mei 2020 algu despues di 11 or di anochi, for di un outo partikular a baha e víktima na sala di emergensia di Curaçao Medical Center (CMC). E víktima tabatin vários hinká na entre otro pechu, brasa i tambe vários kòrtá den kara.  Riba e dia en kuestion, e víktima tabata huntu ku algun otro persona na altura di un snèk den Piscaderaweg. Na un momentu dado a surgi problema entre e víktima i un òf mas persona. E problema a eskalá i víktima Dylmer Dielingen, nasé na Kòrsou dia 25 di desèmber 1983, a resultá hinká den pechu i kòrtá na vários parti di su kurpa na entre otro su kara.

Ayera a detené e sospechoso na un adrès na Grote Berg i a presente dilanti un fiskal ouksiliar ku a ordená su enkarselashon pendiente mas investigashon.