Preokupashon grandi pa kasonan di atrako ku ta oumentando

WILLEMSTAD.-Den e seshon di informashon di gobièrnu di Kòrsou, Kuerpo Polisial pa medio di su bosero Imro Zwerwer a duna informashon riba e situashon di preokupashon ku outoridatnan ta notando pa loke ta trata kasonan di atrako ku ta oumentando. Partikularmente oumentu di atrako den bibienda ta oumentando.

Zwerwer a duna di konosé ku di yanüari 2020 te ku e promé dianan di ougùstùs a registrá un total di 171 kaso di atrako. Den e lunanan aprel i mei te ku yüni e kasonan tabata relativamente abou, sinembargo despues di esei a kasonan a oumentá di forma bárbaro atrobe. Di e 171 kasonan registrá 52 a tuma lugá den kas di hende i 52 kaso den establesimentunan. A logra hasi 62 detenshon, pero esei no ta nifiká ku a solushon 62 kaso pasobra mester tene kuenta ku tin kasonan ku mas ku un sospechoso.

54 di e 62 sospechosonan ta hende lokal, 2 ta kolombiano, 2 venezolano, 1 ta dominikano i 3 ta di otro pais. Mitar di e sospechosonan detené ta entre 20- 29 aña di edat.

Polis ta rekomendá pa sòru pa sufisiente lus rondó di kas den anochi. Ta komprendibel ku hendenan ke spar koriente, pero den anochi hustamente ta mihó pa sòru pa mas iluminashon rondó di kas. Tambe sòru pa palu grandi no tapa bista di bos kas. Perkurá pa bon lòk na porta i bentananan. Si por instalá kámara i tambe alarma. Sea alerta ora kachónan ta grita persistente wak kiko ta pasando. Pa esnan ku ta riba kaya anochi, evitá di usa mesun ruta semper pa bai kas i na kaminda keda alerta si por tin mesun vehíkulo ta keda kore bo tras. Mas detaye den edishon di EXTRA.