Update vershon ofisial di polis:

Djárason 21 di aprel 2021 alrededor di 09.45’or, Sentral di Polis a risibí informashon ku tin un atrako tumando lugá na un toko riba Ronde Klipweg.
Mesora a dirigí un unidat polisial na e sitio i na nan yegada a topa ku tres hòmber saliendo for di e toko. Polis a mester a usa su arma reglamentario pa para e hòmbernan aki i un di e sospechosonan a risibí herida di bala na su pia robes. Na e sitio polis a detené e tres hòmbernan sospechoso:
 D.P.S. di 46 aña di edat;
 G.A.G. di 31 aña di edat;
 N.J.S.O. di 17 aña di edat, tur tres nasé na Kòrsou.
Ambulans a transportá e sospechoso heridá pa departamentu di emergensia di C.M.C. i tambe a transportá e dama kasá di doño di e toko ku a keda maltratá pa un di e sospechosonan.
Kontinuando ku e investigashon parti patras di e toko, polis a haña i konfiská plaka kèsh, boter di bibida alkohóliko i sigaria ku e hòmbernan a bai ku ne for di e toko i tambe un arma di kandela.
A presentá e trio dilanti un fiskal ouksiliar ku a ordená nan enkarselamentu pendiente di mas investigashon.

Tiramentu den área Kirindongo

WILLEMSTAD.-Polisnan ta hopi alerta i aktivo den kaya. Un ratu pasa a logra detené algun hòmber sospechá di a tira atrako riba un toko den área di Rondeklipweg. Un ratu despues polis a señalá e tiponan den besindario di Kaminda Rignald Recordino i a aktua mesora riba esaki. A logra arestá tur tres sospechoso.

Den área di Bonam tabatin bashamentu di bala ku a pone ku abitantenan a sali for di nan kas. Pa wak kiko ta pasando. E porta dilanti di un bibienda a haña bala loke a pone ku e habitante un señora di edat avansá a spanta bastante. A pidi ambulans pa duna asistensia profeshonal na e abitante.

Polis a tira atrakador

WILLEMSTAD.-Na e momentunan aki tin basta polis den área di Bonam, despues ku polis a tira riba un sospechoso den kaso di atrako. E promé informashonnan ta indiká ku e persona lo a tira un atrako riba un toko i polis a reakshoná sumamente lihé. Mas detaye ta sigui un bes.