Update:

E víktima ku a risibí tiru fatal for di arma di un agente polisial riba djadumingu 9 mei 2021 na Corriweg a keda identifiká komo; Wilmer Alfonso Nieto Nieto nasé na Venezuela, 7 novèmber 1993.

Update: Vershon ofisial di Kuerpo Polisial

WILLEMSTAD - Djadumingu 9 di mei 2021 alrededor di 22.00’or, Sentral di Polis a dirigí un unidat polisial na un kompleho di apartamento riba Corriweg pa un problema entre algun persona.

Na momentu ku polis a yega na e apartamento, habitante di e apartamento a indiká na polis ku e tabatin problema ku un hòmber ku a menas’é.

Pero na momentu ku polis a yega na e sitio, ya e hòmber aki a bati retirada.

Mesora e unidat a bai kore den besindario, en buska di e persona aki pa atendé e problema.

Na altura di un snèk den besindario di e apartamento, e unidat a wòrdu sorprendí pa e hòmber aki ku nan tabata buska.

For di investigashon preliminar a sali na kla ku e hòmber aki a aserká e unidat di un forma menasante, ku a obligá un di e polisnan di lòs tiru dirigí riba e hòmber aki, ku a alkans’é na su kabes.

A konsekuensia di e heridanan ku el a sufri, e víktima a bin fayesé na e sitio mes.

Dòkter di polis ku a presentá na e sitio, a konstatá morto di e hòmber ku ainda no a keda identifiká.

-----

Kuerpo Polisial i personal di Landsrecherche ta enkargá ku investigashon mas leu.

WILLEMSTAD. - Ayera algu promé ku 12 or di anochi, Kòrsou ta registrá un kaso lamentabel, ora ku polis ta tira un hòmber ku resultado fatal riba Corrieweg na altura di Snack45.

E promé informashonnan no ofisial ku ta sirkulá na e sitio, ta indiká ku polis mester a bai duna asistensia entre di dos persona ku tabatin problema ku otro. E problema lo mester tabata relashoná ku pago di apartamentu i kosnan a kuminsá sali for di man.

Polis ta yega pa intermediá i un dado momentu un di e personanan lo a hasi un moveshon ku polis no a tolerá i asta tin menshon ku e persona lo mester a saka un arma di kandela, loke ku a pone ku polis a saka su arma reglamentario i tira dirigí ku resultado fatal.

A yama ambulans pa akudí na e sitio i na nan yegada tabata bisto ku nan no por a hasi nada mas pa e persona en kuestion.

Personal di e diferente unidatnan a yega na e sitio pa kondusí e investigashon i tambe dòkter di polis a yega i konstatá morto.

Manera ta menshoná ku e informashon ta preliminar i no ofisial.

No por bisa ku a topa ku un arma di kandela na e sitio di e persona. Esaki lo mester sali na kla  for di e investigashon andando.

E agente polisial ku a lòs e tiru fatal a bai ku reshèrshinan pa duna su promé deklarashon riba e suseso lamentabel aki.

Foto

...Riba e kombinashon di foto por tuma nota di e persona drumí abou ya sin bida i tambe e investigashonnan ta andando den e kaso aki...