WILLEMSTAD.- Korant hulandes ‘Het Parool’ djabièrnè a indiká ku a arestá yu’i Kòrsou Randall D. (39) djamars último na Kòrsou. E aresto a tuma lugá dor di un tim di reshèrshi for di Amsterdam. Segun e korant hulandes nan a traha huntu ku polis di Kòrsou. Pero te ainda polis di Kòrsou no a duna niun informashon tokante e kaso en kuestion. Randall D. a nase na Kòrsou, pero gran parti di su bida el a biba na Amsterdam. Segun e artíkulo polis di Amsterdam tabata buskando D. pa basta tempu kaba. Nan a arestá D., na momentu ku e tabata bayendo supermerkado.
Segun polis di Amsterdam Randall ta un di e dos personanan ku den aña 2018 a tira un stazjèr di 17 aña mata den e kas di bario Wittenburg na Amsterdam. Durante e tiroteo hopi mucha tabata presente den e kas di bario. E stazjèr di 17 aña Mohamed Bouchikhi a fayesé, Gianni L. a keda heridá. E hende ku a tira Bouchiki no tabatin intenshon pa mata e stazjèr, pero nan a buska Gianni L., ku supuestamente tabatin un problema ku yu hòmber di D. E tiramentu, segun hustisia hulandes, a tuma lugá dor di Randall i Emylio G. (28). G. awor ta será. E ta kondená pa un otro tiroteo.
Ambos Randall D. i Emylio ‘Millie’ G. a biba den Amsterdam-Zuidoost. Segun polis hulandes nan ta kriminalnan konosí. Segun polis den aña 2018 G. a tira ku un arma outomátiko, D. supuestamente a tira ku un pistol.
Den un tiroteo tambe un mucha muhé ku a traha den e bar di e kas di bario a keda heridá.
Segun polis hulandes D. tabata enbolbí entre otro den e asesinato di e kriminal Lucas Boom dia 9 yüni 2015 na Hulanda i tambe den un likidashon dòbel ku a tuma lugá na Amsterdam den aña 2012.