WILLEMSTAD - Djamars 7 mei 2019, alrededor di 04.08or di mardugá, sentral di polis a risibí un yamada ku tin un ladronisia ku violensia tumando lugá na un kompleho di apartamentu den área di Schelpwijk i ku tin hende heridá.

Mesora patruya a bai na e sitio i a konstatá ku tabatin un hòmber drumí abou den su kas ku herida di bala i no ta duna señal di bida i un otro hòmber ku kap na kabes.

For di un investigashon preliminar ku polis a realisá na e sitio a resultá ku dos hòmber di nashonalidat asiátiko a yega kas i nan a wòrdu sorprendé pa kuater (4) hòmber ku kara tapá.

Na e momento ei a start un forsageo i un di e hòmbernan aki a haña un kap na su kabes.

Despues un di e sospechoso a kibra un porta di un di e apartamentunan i a lòs un tiru dirigí riba un hòmber Hulandes Oropeo ku tabata paden di su kas.

Despues di esaki e sospechosonan a hui for di e sitio.

Dòkter di polis a konstatá morto di e persona. Riba òrdu di Fiskal di Ministerio Públiko a konfiská e kurpa sin bida di e personanan aki.

Hòmber ulandes oropeo asesiná den atrako na Schelpwijk

WILLEMSTAD.- Relashoná ku e kaso di atrako/asesinato ku EXTRA a informá di dje algun ratu pasá, bosero di polis sr. Imro Zwerwer a informá ku e prome investigashon a mustra ku a tuma lugá un kaso di atrako riba dos hòmber di desendensia asiátiko ku a kaba di yega na Kaya Karko den Schelpwijk. Einan malechornan ku a bai tira atrako lo a los bala i den esei un di tres hende, un hòmber ulandes oropeo a resultá seriamente herida te ku el a muri na e sitio.

Polisnan a topa ku un jacket ku emblema paresido na esun di polis. Tambe a topa ku un telefon i otro testigunan silensioso.

E kaso a tuma lugá na un kompleho di apartamentu den e bario menshoná. Polis no por a duna un splikashon di e hòmber ulandes oropeo den konekshon ku e dos asiátikonan. E investigashon ta kontinuá i asina ku tin mas detaye EXTRA lo informá di esei.

Polis atendiendo asesinato na Schelpwijk

WILLEMSTAD.- E mainta aki a habri violento, den sentido ku na e momentunan aki polis ta atendiendo un kaso di asesinato den e área di Schelpwijk. E prome informashonnan ta indiká ku posiblemente lo ta trata di un kaso di atrako kaminda e situashon a sali kompletamente for di man. EXTRA ta pendiente informashon ofisial di parti di polis. Di tur manera e prome informashon na e sitio ta indiká ku den e kaso di atrako lo a tira e víktima esei a resultá fatal. Tambe lo tin un otro persona ku ta herida ku arma blanku. Asina tin mas detaye EXTRA lo informá di esei.