WILLEMSTAD.- Alrededor di 12.30 di mardugá polis a bai ku urgensia na pòmp di gasolin Brievengat pa atendé ku un vehíkulo ku a aksidentá kontra di muraya.

Na yegada di e patruyá di Rio Canario a bin topa ku un vehíkulo shinishi para mei mei di kaminda i tabatin bastante daño material. Na momentu ku e polisnan a yega serka nan a tuma nota ku e vehíkulo tabatin kantidat grandi di perforashon di bala i e shofùr tabatin heridá di bala na altura di su kabes I tambe barika.

Mesora a pidi asistensia di mas patruyá na e sitio mirando ku ta trata aki di un kaso di tiramentu ku herido.

Demas patruyá nan a yega rápido na e sitio i a será e área pa por a hasi investigashon. Ambulans tambe a presentá na e sitio pero lamentablemente no por a hasi nada mas pa e víktima.

Dòkter di polis a konstatá morto di e víktima kual a pèrdè su bida riba su fecha natal.

Sigun informashon ku polisnan a risibí ta ku e tiramentu a tuma lugá na un diskotèk den serkania. E víktima a yega parker dilanti di e diskotèk i un vehíkulo a yega para su tras i mesora algun tipo fuertemente arma a baha i kuminsá lòs tiru dirigí riba e víktima. Durante di e tiroteo e víktima a trata di bandoná e sitio i a bek dal den e vehíkulo di e tiponan aki i tambe di otro personanan ku tabata na e sitio. Durante di e maniobra pa bandoná e sitio, e víktima a hera di dal e agresor ku outo.

Na momentu ku el a logra sali for di e sitio di parker el a bai ku un spit haltu i bai aksidentá kontra di e muraya di pòmp di gasolin Brievengat.

E tim di Reshèrshi i tambe TFO a presentá na e sitio i a konfiská vários huls i tambe parti di e vehíkulo di e agresornan ku a keda atras.

Den e vehíkulo di e víktima polisnan a topa ku un kantidat grandi di sèn kèsh.

Polisnan lo kontinuá ku mas investigashon den e kaso aki.