Outoridatnan investigando empresa importado di diesel

WILLEMSTAD.- E último informashon relashoná ku e kaso aki ta indiká ku outoridatnan a bai pa seya e tankinan ku diesel. EXTRA a komprondé di esnan responsabel ku basta dia kaba nan ta wardando kontesta di minister Camelia-Römer pa nan transportá e diesel pa un otro empresa ku si tin su pèrmit di molèster pero no a haña kontesta di e mandatario. Konsekuentemente nan no por a move e diesel i pa awe haña outoridatnan na gran eskala ku a bai seya e tankinan ku diesel.

Informashon di último ora ta indiká ku na e momentunan aki di mainta polis, brantwer i servisio di medio ambiente a bai na e empresa InterCaribbean na Heintje Kool. Outoridatnan a blòkia e entrada di e empresa i a kuminsá ku investigashon. EXTRA a tuma nota ku abogado mr. Chester Peterson a yega na e sitio pa duna asistensia na e gerensia di e kompania.

Manera ta konosí tin basta dia kaba ku tin un disputa serio entre e empresa i instansianan di gobièrnu relashoná ku un kargamentu di diesel ku e kompania aki a importá. Punto ta ku e kompania a importá e diesel i a paga tur impuesto nesesario na duana, pero despues a resultá ku nan no por bende nan produkto ku empresanan grandi na Kòrsou mas. Esaki debí ku Curoil den un karta a informá e klientenan ku si haña sa ku nan a kumpra diesel di InterCaribbean, ku Curoil lo no bende diesel mas ku nan.