WILLEMSTAD.- Un simpel kòntròl riba un vehíkulo, a kondusí na konfiskashon di un arma di kandela i tambe detenshon di e akusado L. Cooper Baez (22).
Tabata dia 6 di ougùstùs último, polis a señalá un vehíkulo poko sospechoso riba Gosieweg, paresido na e Vitz Blou ku algun hòmber a kaba di tira atrako den dje, na un establesimentu riba e dia enkuestion.
E unidat a para e vehíkulo aki pa un kòntròl i durante di e kòntròl a haña i konfiská un arma di kandela den un tas di barika di e sospechoso. Momento ku e polis a para e shofùr pa un kòntròl, e mes a indiká ku e tin e arma riba dje. Na polis el a bisa ku el a kumpra e arma, pa motibu ku e tabatin problema ku un persona ku na vários okashon a menas’é. El a bai polis vários bia i hasi denunsia, pero nunka nada no a bin afó. Esei tabata e motibu ku el a kumpra e arma pa protehá e i su famia.
Remarkabel tabata ku e akusado a kometé e akto den su periodo di prueba.
Fiskal a haña e akusashon probá i a demandá e akusado na 25 luna di kual 8 kondishonal.
Hues den su desishon a desviá for di e demanda di fiskal i a kondená e akusado na 18 luna di kual 6 kondishonal ku un periodo di prueba di 3 aña.