WILLEMSTAD, - Un polis ku aparentemente tabata basta fuma ayera nochi a kibra un bentana di un restorant den Penstraat. Asina doño di e restorant “Chez Ray”, Raymond Chaar, a deklará ayera anochi na EXTRA. Segun Chaar ayera anochi mas o ménos mitar di nuebe e polis a bati porta di e restorant. Promé ku e doño di e restorant por a habri su porta e polis a kibra un di e bentananan.
Segun Chaar e polis su mama ta bisiña di e restorant. E agente a akusá doño di restorant pa sera kranchi di pipa di awa pafó di e kas di su mama. E polis a zundra e doño di restorant. El a ninga di mishi ku niun kranshi.
E doño di restorant a yama polis pa atendé ku e kaso, pero promé ku nan a yega e agente rabia a Sali kaba. El a bisa ku e lo paga pa e bentana kibra, pero na mesun momentu a splika ku komo polis e tin derechi pa kibra bentana.
Doño di e restorant ta hopi disgustá ku e aktitut di e polis. E tin miedu ku den futuro e polis por usa su arma di kandela. Na su opinion tin ku imponé medida kontra e ámtenar.