WILLEMSTAD – Polis i Brantwer a pasa un anochi okupá ku vários insidente na diferente sitio di Kòrsou. Entre e kasonan tabatin un aksidente di tráfiko na Saliña ku a resultá den un dama heridá, un persekushon di polis, un atrako ku machete na Kirindongo Abou i un kandela ku a destruí un edifisio riba Kaminda George Willems.

Jeep a dal bus na KFC Saliña

Durante oranan di mardugá tabatinun aksidente di tráfiko a tuma lugá riba Schottegatweg, na altura di KFC Saliña. Segun informashon risibí, un jeep a pasa den lus kòrá i a dal un bus ku tabata kore riba e kaminda. E impakto a resultá den un dama ku tabata den e bus keda heridá. E dama a ser transportá pa Curaçao Medical Center (CMC) pa tratamentu médiko. Na e sitio a pidi asistensia di ambulans tambe pa atendé ku e okupante di e jeep. Polis a presentá pa investigá e sirkunstansianan di e aksidente.

Persekushon di Audi kòrá for di brùg te na Post 5

Den otro insidente, polis a persiguí un Audi kòrá ku tabata kore di manera iresponsabel. E persekushon a kuminsá riba brùg i a kontinuá te na Post 5, kaminda polis a logra stòp e vehíkulo. Durante kontrol a sali na kla ku e konduktor, un hóben, no tabatin reibeweis. Polis a kita e outo for di su poder i a hib'é warda pa motibu di su komportashon den tráfiko.

Hóbennan atraká ku machete na Kirindongo Abou

Na Kirindongo Abou, un grupo di hóben a bira víktima di un atrako. Segun informashon risibí, dos hòmber den un Kia Forte a baha for di e vehíkulo i, armá ku un machete, a kita telefònnan di e hóbennan. Despues ku e atrakadornan a bandoná e sitio, e hóbennan a regresá sitio i a haña un di e telefònnan tirá abou. Nan a purba lokalisá e otro telefòn, pero no a logra hañ'é. Ora nan a purba yam'é, e aparato tabata pagá.

Kandela a destruí edifisio na Kaminda George Willems

Brantwer di Rio Canario tambe a mester sali durante oranan di mardugá pa un kandela riba Kaminda George Willems, na altura di Pita Farm. Inisialmente, Sentral di Brantwer a risibí un notifikashon di kandela di mondi. Na yegada di bomberonan a a tuma nota ku aki ta trata di un kandela mas grandi. Tambe a sali na kla ku no tabata trata di un kandela di mondi, sino di un edifisio kaminda tabata traha ku palu ku tabata na kandela.

Segun informashon risibí, e edifisio a kima kompletamente. E persona ku a hasi e yamada inisial tabata na un distansia konsiderabel for di e sitio, i pa e motibu ei no por a distinguí ku tabata un edifisio ku tabata na kandela. Te na e momentu aki no tin informashon tokante e kousa di e kandela.