Segun Mc William

WILLEMSTAD.- E kantidat di mama, tata i hóbennan ku a depositá nan sèn den QuickPromo ta refleho di situashon sosial i kosto di bida haltu den nos pais. Asina lider di partido MAN, Giselle Mc William, ta duna di konosé.

E ta indiká ku vários siudadano a aserká su persona puntrando su opinion riba QuickPromo. “Mi a skohe pa opiná riba esaki den e ola di komentarionan ku tin e último dianan.” Mc William ta mustra ku Ofisina Sentral di Statistik, CBS, a konstatá ku 60 porshento di poblashon no por paga nan debenan fin di luna.

Esaki, pa su persona, ta un indikashon di e desesperashon ku siudadanonan ta biba den dje loke ta hasi nan vulnerabel pa promesanan pa gana sèn fásil i lihé. Pa e motibu aki, Mc William ta di opinion ku, spesialmente den situashonnan finansiero difísil ku hopi na Kòrsou ta aden, mester hasi mas na konsientisashon di e poblashon pa nan no kai pa e tipo di plataformanan manera esun di QuickPromo. E konsientisashon mester asta bai mas leu ku e ta dirigí kontra tur wega di plaka tambe manera kasino i weganan di number, pero tambe fasilidatnan di krédito.

Aki Mc William ta mustra riba e kustumber di hopi aña na Kòrsou pa tuma kos riba bòn. Den esaki tambe e lider polítiko di partido MAN ta mira un kambio preokupante. Si a kuminsá duna bòn di 10 luna pa kumpra kos pa kas fin di aña kuné, esaki a kambia pa tumamentu di paña pa bai fiesta kuné riba bòn, i awor asta ta tuma komestibel na supermerkado i toko riba bon di 10 luna, Mc William ta indiká.

Pa loke ta responsabilidat di Gobièrnu, Mc William ta indiká mas aleu ku ta klaro ku Gobiernu no tin responsabilidat den e situashon ku a surgi ku QuickPromo. “Pero, loke sí ta Gobièrnu su responsabilidat ta duna e pueblo un alivio bahando ‘omzetbelasting’ (OB) riba importashon di kuminda i redusí preis di gasolin i disel ku lokual e haña èkstra den kaha for di OB ku ta kobra riba importashon di produktonan.

“Danki Dios Gobièrnu si no mester hinka sèn den QuickPromo pasobra tur dia e sí ta haña mas sèn den kaha debí na oumento di kosto di bida. Sèn for di entre otro esunnan ku a hinka e tiki ku nan tin den QuickPromo pa nan por paga nan debenan fin di luna.” Finalmente, Mc William ta bisa ku e no ta husga ningun hende pa a skohe pa purba nan suerte ku QuickPromo. “Loke si mi ta haña hopi tristu ta kon ta eksponé e hendenan den nan doló riba retnan sosial den, ku nan potrètnan durante e diferente enkuentronan di QuickPromo.”