WILLEMSTAD – Relashoná ku e insidente ku a tuma lugá ayera anochi ku parlamentario Martines, polis a emití un komunikado ofisial den kual ta bisa ku djadumingu 13 di febrüari 2022 alrededor di 00.03, Sentral di Polis a dirigí un unidat na un adrès na Kaya Seru Mahuma, na unda tabatin un fiesta tumando lugá. Di informashon ku polis ta disponé di dje, no ta promé bia ku fiesta ta wòrdu organisá na e adrès aki durante di ora di toke de keda. Na yegada di e promé unidat, el a tuma nota ku bèrdat tabatin un fiesta na kua tabatin sigur riba 100 persona presente.

Debí ku tabata imposibel pa e repartí but dor di e unidat aki so na e bishitantenan, el a pidi refuerso pa por kumpli ku e tarea aki i alabes hasi detenshon di e organisadó. A pidi tambe un fiskal ouksiliar pa yega na e sitio pa si mester drenta den bibienda, ya ku ta trata aki di un kompleho di apartamentu.

Na e sitio a detené e hòmber sospechoso N.D.C. di 36 aña di edat nase na Kòrsou en konekshon ku violashon di reglanan konforme e preskripshon di e Lei di Estado di Emergensia ku ta trata e pandemia di Covid-19.

Miéntras ku e unidatnan presente tabata repartí but na loke a sobra di bishitantenan, ya ku entre tantu diferente a move for di e sitio, un agente a bai atendé un shofùr ku tambe tabata na e adrès ei, riba e echo ku su vehíkulo tabatin glas skur. Durante di esaki, a surgi un interkambio di palabra entre e polis i e shofùr i e agente a duna di konosé na e shofùr ku e ta detené.

Seguidamente a surgi un forsageo entre e polis i e shofùr, debí ku e shofùr tabata stroba e polis den ehekushon hustifiká di su trabou. Durante di e forsageo aki e polis a keda lastimá i mester a risibí tratamentu médiko. En bista di e situashon tenso ku tabata eksistí na e momentunan ei na e sitio, e fiskal ouksiliar a opta pa laga e shofùr aki mèldu na warda, na unda lo a kontinuá ku e proseso di detenshon.

Na warda di reshèrshi, a presentá e shofùr aki, e hòmber sospechoso M.G.M. di 48 aña di edat nase na Kòrsou, ku anteriormente a keda detené pa no sigui instrukshon duná dor di outoridat, opstruí un empleado públiko den ehekushon hustifiká di su trabou, resistí aresto i violashon di reglanan den kuadro di Covid-19, dilanti di un fiskal ouksiliar. Despues di interogashon ámbos sospechoso a keda lagá den libertat, miéntras e investigashon ta kontinuá.

Parlamentario pa Partido KEM, Michelangelo Martines a duna su vershon tambe di e insidente riba su página di Facebook. “Low Martines ningun momentu no a wòrdu detené.” Low Martines tabata na un apartamento den un kura kaminda tabata tin un fiesta, despues ku polisnan a yega i para e fiesta i a laga tur hende drenta nan outo bai, ya despues di un ora ku esei a tuma lugá Low Martines a sali for di e apartamento ku e tin di hür i a kana bai su outo, “einan mi a wòrdu aserka pa un polis ku a bisa mi ku, 5 dia pasa el a ‘kijk door de vinger’ pa mi yu muhé i no a bai ku mi outo, i ku e ke mira ken lo move mi outo for di kaminda e ta para sin demostr’é mi pèrmit ku mi tin mag di tin glas skur. Na e momentu ei mi persona a reakshoná riba e polis aki i bisé pe bai hasi kos di payaso aya banda i mi a habri mi outo i sinta aden.” E parlamentario ta indiká ku ora e kier a sera su porta di outo e polis aki a disidí ku e ta kue e porta di e outo tene i forsega kuné. “Mi a baha for di outo i a bolbe bisa polis pe bai hasi kos di payaso aya banda, durante e forsageo ku e porta di outo mi a bin komprendé despues ku e polis a sufri un kap na su lep. Low Martines a wòrdu pidi pa e pasa na warda di polis pa por pone tur e suseso aki riba papel. Ami a drenta mi outo mi so i kore bai warda di polis bai deklará e lokual ku a pasa i pa despues bini mi kas,” asina Martines a finalisá bisando.