Detenshon hòmber 20 aña awe mainta

WILLEMSTAD.- Ministerio Publiko den un informe di último momentu ta duna di konosé ku awe 15 di desèmber a detené un hòmber (20) den kuadro di e investigashon Inex 2.0. Ta sospechá e hòmber aki di embolbimentu den e robo di droga for di warda di polis Rio Canario. E detenshon di e hòmber a tuma lugá den oranan tempran di mainta dor di Tim di Aresto.

Debí na e importansia i impakto di e kaso aki, e tim di investigashon den kual miembronan di KPC i RST ta koperá ku otro ta sigui hasi investigashon intensivo pa ku e robo ku a tuma lugá den e anochi di 13 riba 14 di òktober 2018. E tim di investigashon no ta ekskluí ku lo tin mas detenshon den e kaso aki. E hòmber ta detené bou di restrikshon i lo ser presentá dilanti hues komisario djabièrnè benidero. Den interes di e investigashon no por duna mas informashon na e momento aki.