WILLEMSTAD.- Den dianan di Siman Santu di 18 pa 23 di aprel próksimo tantu Kuerpo Polisial di Kòrsou komo Warda Kosta lo tene kontròlnan severo tantu na tera komo riba laman. Esaki e dos entidatnan a anunsiá ayera durante rueda di prensa ku e Tim Operashon Siman Santu a tene.  E tim enkargá ku e operashon ta konsistí di representantenan di: Kuerpo Polisial Kòrsou, Selikor, Warda Kosta, Citro, Ambulans, Rode Kruis, Stichting Slachtofferhulp Curaçao, Janthiel Security, Hawk Eye Security i CTB.

Kuerpo Polisial a informá ku lo bai tin dos punto prinsipal di sosten kual ta e pòst na Montaña i esun na Barber. E otro pòstnan tambe lo yuda kubri e arianan turístiko.

Mas aleu Kuerpo Polisial a informá ku e siguiente medidanan di prevenshon ta vigente: Shofùrnan mester sòru pa tur dokumentu di nan vehíkulo ta na òrdu i e vehíkulo mes mester ta den un bon estado tékniko; lo tin sufisiente unidat tantu uniformá komo na sivil ku lo kontrolá na e diferente playanan, pero tambe otro sitionan turístiko; un petishon pa no laga kosnan di balor den outo atras; stashoná vehíkulo na sitionan ku tin sufisiente iluminashon; sigurá bo mes ku bo vehíkulo ta di lòk i ku tur e glasnan ta será promé ku bandoná e vehíkulo.

Polis lo traha den estrecho koperashon ku kompanianan di seguridat na playanan i tambe otro instansianan ku ta duna yudansa di emergensia pa garantisá un yudansa profeshonal rápido i efektivo. Lo bai tin kontròl di tráfiko na diferente sitio riba tantu Bièrnèsantu i Pasku di resurekshon. Riba dicho dianan konsumo di alkohòl ta hopi haltu.

E Departamento di pèrmit di Polis lo kontrolá tambe establesimentunan i esnan ku ta bende kos na playanan pa chèk si tur pèrmit ta na òrdu. Brantwer i Stichting Slachtofferhulp Curaçao lo ta disponibel pa den kaso ku esaki ta nesesario.

Ta bon pa anunsiá tambe ku den kaso ku e aria di Caracasbaai tin hopi vehíkulo i ta opstakulisá e tráfiko motorisá, polis por tuma medidanan nesesario pa garantisá e fluho rápido di tráfiko. Pa kasonan no urgente por yama 917 i den kaso di urgensia por yama e number 911.

Warda Kosta lo tene kòntròl riba botonan pa chèk si tur dokumentonan i rekisitonan di seguridat ta abordo i na òrdu: entre otro vèst, flair i aparato pa paga kandela.

Lo tin kontròlnan riba komportashon di botonan i tambe sea-doo sigur kaminda hende ta landa. Lo kontrolá koredónan di sea-doo pa mira si tur papel na na òrdu.  Lo aktua mesora riba koredónan di sea-doo ku ta kore drenta área kaminda hende ta landa riba velosidat haltu i trese otro hende su bida na peliger.

Tambe lo kontrolá riba uso di alkohòl. Ademas Warda Kosta konhuntamente ku CITRO lo atendé kasonan di reskate riba laman. Den kaso di emergensia por yama 913. Puntonan importante: tene kuenta ku kantidat di pasahero ku ta permití den e boto, mester tin aparatonan pa komuniká abordo; Radio VHF, telefòn selular ku bateria kargá i tambe flairnan pa por indiká bo posishon den kaso di búskeda.