WILLEMSTAD – Outoridatnan polisial mester a akudí den oranan di mèrdia na un kas den Wishi pa un hòmber morto. Bisiñanan a kuminsá sinti un holó fuerte i a disidí di bai buska drechi i via bentana por a mira e hòmber benta abou den un plas di sanger. Ta trata di un hòmber latino ku último biaha ku a mir’e tabata djaluna último. Supuestamente e lo mester ta traha den konstrukshon. Ora ku outoridat nan a  kibra porta pa drenta e kas a konstatá ku tabata morto kaba pa algun dia. Riba su telefòn tambe por a nota ku for di djaluna tabata último biaha ku a usa esaki. TFO i patólogo a yega na e sitio pa hasi investigashon preliminar ounke pa polis na promé bista lo ta trata aki di un morto natural. Motibu prinsipal ta ku e kas tabata duru sera i manera a indiká kaba mester a kibra e porta dilanti pa por a drenta. EXTRA ta keda pendiente konfirmashon ofisial di outoridatnan si ta trata aki di un krímen òf morto natural.