WILLEMSTAD – Awe alrededor di 05.00 or di mardugá, personal di Divishon di Krímen Organisá den koperashon ku KMAR a tene entrada hudisial na dos (2) diferente adrès.

Respektievamente; Commandeursweg i Punta Cardonweg.

E entradanan hudisial ta den kuadro di investigashon ku ta andando relashoná ku kasonan di violashon di e lei di opio.

Durante di e investigashon a haña i konfiská droga, drone, sèn, televishon (flatscreen) prenda i tambe plaka kèsh. Relashoná ku esaki na e adrèsnan menshoná polis a detené dos hòmber sospechoso; W.A.A.G. di 18 aña di edat i A.J.R.F. di 37 aña di edat, ámbos nasé na Venezuela.

A presentá e sospechosonan dilanti un fiskal ouksiliar ku a ordená nan enkarselamentu pendiente di mas investigashon.

Tambe na e mesun adrèsnan menshoná a detené diferente persona estranhero ku no tabatin dokumentunan nesesario pa por permanesé riba nos isla. Esakinan a keda entregá na e Departamentu di Imigrashon, kual a keda enkargá ku e investigashon i deportashon di e estranheronan aki.