WILLEMSTAD - No opstante anunsio di medidanan adishonal di parti di gobièrnu pa trata na kontrolá e oumento di infekshonnan pa loke ta trata Covid-19, polis no ta tumando nota ku esaki ta keda kargá den tur gremio di nos komunidat.

Den e anochi di bispu di Pasku pa mardugá di Pasku, na diferente sitio riba kaya tabatin bastante aglomerashon kombiná ku ponementu di ‘fever’.

Na momentu ku outoridat kita e multitut for di un sitio, esaki ta forma na un otro sitio.

Un komportashon basta iresponsabel, di siudadanonan ku aparte di no ta respetá reglanan den nos komunidat ni ta sigui òrdu di outoridat, ta eksponé nan mes i otronan na tur rísiko i sigur di kontagio ku e vírus.

Kuerpo Polisial lo sigui asumí su responsabilidat di sòru pa tur hende kumpli ku reglanan i leinan vigente, pero nos kada un mester realisá, ku nos mes ta e proménan responsabel pa kuida nos mes i kuida nos sernan kerí.

I burlando di regla, òrdu i instrukshon, nos no ta aportá na esaki.

Den próksimo dianan lo kontinuá ku kontrolnan dirigí riba entre otro aglomerashon i lo aktua ku man duru kontra di esnan ku ta neglishá òrdu i ta skohe konsiente na pone salubridat general na peliger.