WILLEMSTAD – Polis durante di e anochinan di Festival di Tumba 2017, lo tuma akshon kontra tur outomobilista, espesialmente koredó di motosaikel, bròmer, skuter i quad di kua dokumentunan di e kategoria di vehíkulonan aki no ta na òrdu òf e vehíkulo no ta kumpli ku eksigensianan tékniko pa ta riba kaminda públiko.

Esaki antisipando riba e akshon ‘Aktua robes, sintié un bes’ ku e aña aki tambe lo keda efektuá durante di e periodo di Karnaval. E akshon ta bai keda tene i pa garantisá un tráfiko sigur den e área rondó di Curaçao Festival Center. Polis lo no permití ponementu di ‘Fever’ riba kaya i e vehíkulonan ku kua ‘Fever’ ta keda tene, tambe polis lo kita for di e doño òf shofùr.

Koredónan di motosaikel, bròmer i skuter mester tin un hèlm adekuá bisti na momentu ku nan te kore e vehíkulonan aki.

Den kaso ku polis kita e vehíkulonan aki pa motibu di ‘Fever’ durante di e siman di Festival di Tumba aki, e doño lo por haña esaki bek despues di e último marcha di Karnaval. En todo kaso no promé ku polis a hasi inspekshon riba e vehíkulo i ku e doño a kumpli ku tur e rekisitunan nesesario manera e.o. pago di kran, drechamentu di dokumentunan ets.

Na momentu ku kita vehíkulo di kua dokumentunan di e kategoria di vehíkulonan aki no ta na òrdu òf e vehíkulo no ta kumpli ku eksigensianan tékniko pa ta riba kaminda públiko ta duna esei bek despues ku a konsulta ku Ministerio Públiko kual lo chek si tur e dokumentunan i butnan ta paga.

Ta pidi un i tur pa tuma bon nota di esaki pa evitá inkonbeniensia.