WILLEMSTAD.- Siman pasa, Kuerpo Polisial di Kòrsou a tuma nota di un entrevista na un emisora lokal, unda un persona ku ya a risibí un sentensia pa un kaso penal, ta lansa algun akusashon sumamente serio den direkshon di algun agente polisial.

Ta trata aki di kaso di e komersiante di fam Koense ku huntu ku su kasa a keda kondena pa e.o trafikashon di hende. E hòmber di fam Koense a trese dilanti siman pasa ku e lo no keda ketu i lo kana su kamindanan. Tambe el a hasi menshon di fam di agentenan polisial ku frekuentemente tabata bishita su establesimentu. Segun Koense, si e tabata hasi algu robes, nan lo mester a bisé esaki òf bati alarma mesora.

Maneho di Kuerpo Polisial ta lamentá e echo ku e siudadano aki no a duna un deklarashon  ofisial i/o hasi un denunsia na outoridatnan kompetente di e loke nan ku el a trese dilanti durante di su entrevista. No opstante di esei, maneho lo bai averiguá verasidat di e akusashonnan aki i lo aktua konforme si ta nesesario.

E agentenan en kestion semper tin e libertat pa inmediatamente entregá un keho pa entre otro difamashon kontra di e siudadano aki i kuerpo mes tambe lo tuma e pasonan korespondiente na su debido tempu.