WILLEMSTAD – Polis ta manda un atvertensia pa tur doño i koredónan di skuter, bròmer, motosaikel i tur otro vehíkulonan di motor, pa asina ei tur hende ta na altura na momentu ku polis aktua. Polis no ta bai limitá su kontrol riba skuter, bròmer, motosaikel i otro vehíkulonan di motor na momentu ku nan ta koriendo riba kaya òf ta pasando dor di un kontrol di tráfiko so.

Ta bai pone atenshon tambe riba e vehíkulonan di motor ku ta para riba kaminda públiko manera p.e. riba asera, plenchinan i otro sitionan ku sea ta pertenesé na un kaminda públiko òf un tereno públiko.

Tur vehíkulo, for di momentu ku e ta hasi uso di kaminda públiko i tur loke ku ta parti di esaki, sea ku e vehíkulo ta den moveshon òf e ta pará ketu, mester kumpli ku tur e reglanan di tráfiko.

Den kaso ku polis konstatá kualke infrakshon, lo aktua di forma represivo ku sea un prosès verbal òf kombiná ku konfiskashon di e vehíkulo.

LAGA UN KOMENTARIO

Please enter your comment!
Please enter your name here