WILLEMSTAD - Djaluna 24 desèmber mas o ménos 4’or di mardugá, Personal di Tim di Mantenshon di órden Públiko tabata persiguí un vehíkulo riba F.D. Rooseveltweg ku no a duna oido pa para. Durante e persiguishon e tim a pidi asistensia di otro unidat polisial.

Na altura di Plaza Hariri un patruya ku a bai asistí a sera e kaya pa asina trata na obligá e shofùr pa para e vehíkulo. E shofùr di e vehíkulo no a duna oido na e señal pa para en bes di esaki a subi velosidat i siguí bin ku e outo den direkshon di e polisnan.

Mirando e situashon ku a presentá e polis a hañ’é obligá ta hasi uso di su arma reglamentario. No opstante esaki e vehíkulo a sigui ku velosidat haltu direkshon di Seri Domi. Na altura di Arubastraat e vehíkulo a aksidentá i polis a detené tres sospechoso ku tabata den e vehíkulo. Ta trata di e hòmbernan, S.U.De.L. (16), S.v.H. (19) i H.A.M. (17) tur tres nase na Kòrsou.

Na detenshon polis a konstatá ku e shofùr tabata tin un scharmai di bala na su pia. Patruya a hib’é Poliklínika di SEHOS pa tratamentu médiko, kaminda despues di a risibí tratamentu e la wòrdu detené.

A presentá tur e tres sospechosonan dilanti un Fiskal Ouksiliar.