WILLEMSTAD.-E dianan aki a pone ku hinter komunidat ta den un situashon di tenshon. E kadena hudisial no a tuma e manifestashon di 24 di yüni último, ku a eskala den sakeo i destrukshon leve i ta bai aktua. Ya kaba a hasi detenshon di diferente sospechoso (34 persona riba 24 di yüni i 21 persona riba 25 di yüni). E personanan aki a hasi nan mes kulpabel na destrukshon, sendementu di kandela i robo. Kuerpo Polisial Kòrsou (KPC), Ministerio Públiko (OM) i Recherche Samenwerkingsteam (RST) a uni forsa pa identifiká e otro sospechosonan i pèrsigui esakinan penalmente.

E mensahe mester ta kla ku aktonan kriminal no ta aseptabel. Riba e atardi di 24 di yüni, un kantidat grandi di ladron a drenta den diferente establesimentu di negoshi ku e meta pa sakeá i bai ku tur e inventario di e negoshinan aki. Hopi di e sakeonan a keda filmá entre otro pa kámaranan públiko òf pa otro siudadanonan ku despues a kompartí esakinan via medionan sosial. Ademas, por rekonosé kara di e personanan responsabel pa e sakeo aki hopi bon riba e imágennan aki. Polis lo studia e imágennan aki i lo publiká esakinan pa asina por saka afó ken ta e malechornan aki ta. Pa aworakí lo mustra e imágennan aki di tal forma ku no ta mustra karanan kompleto.

Polis ta hasi un yamada urgente na e personanan aki ku a hasi nan mes kulpabel na e destrukshon i sakeonan aki pa nan entregá nan mes di forma boluntario na polis i tambe pa trese loke a bai kuné durante di e sakeo. Den kaso di e personanan aki lo evaluá posibilidat pa un areglo (‘afdoneing’) ku ta kuadra. Personanan ku no ta duna oido na e petishon pa entregá nan mes i ku polis mes lo buska i detené, lo haña un kastigu muchu mas pisá. Den e kaso ei, den konsulta ku Ministerio Públiko polis lo bai over na publiká imágennan kompletu di e sospechosonan. Chèns ta grandi ku e personanan aki den e kaso ei lo enfrentá un persekushon penal. Ya kòmbersashonnan ta tumando lugá ku Korte den Promé Instansia pa atendé e kasonan aki ku prioridat den e asina yamá ‘snelrechtzittingen’. Mas detaye den edishon di EXTRA.