WILLEMSTAD.- Fiskal Bos ayera a hasi demanda di kastigunan di  trabou inkondishonal pa e akusadonan ku a hasi nan mes kulpabel den kaso Bear òf Kaya i tambe un but di 2500 florin kada unu.

Ta trata di e kaso di kual 6 akusado ta keda akusá di a kometé froude ku “reibeweis”.

Nan ta keda akusá pa korupshon, falsifikashon, mal uso di poder i trabou i tambe soborno.

Pa ku e kaso aki Ministerio Públiko ta akusá R.K. (65), G.N. (52), D.F. (46), M.M. (52), H.F. (46) i G.D. (55) di a kometé e akusashonnan. Tur 6   a presentá  ayera den sala di korte  pa respond’é pa nan aktonan.

E  akusadonan D.F. (46), M.M. (52), H.F. (46) i G.D. (55)  tabata esnan ku tabata ámtenarnan ku tabata laborá na ofisina di reibeweis.

E otro akusado R.K. tabata bende kuminda na e empleadonan di reibeweis, miéntras  G.N. tabatin un skol di “rijles”.  Tur akusado a atmití na polis nan kulpa i tambe den sala di korte ménos D.F.

Pa loke ta trata e akusado D.F.  tin mayoria akusashonnan den su kontra, mirando ku e tabata esun ku tabata supervisá e trabounan.

El a bisa ku tur loke e ta keda akusá di dje, no ta kuadra ku bèrdat. Segun D.F. e otro akusadonan ta gaña riba dje.

El a splika ku na aña 2011 el a wòrdu poné na e funshon ei pa e defuntu lider polítiko Helmin Wiels pa motibu ku kosnan no tabata kana bon na ofisina di reibeweis.

Segun e akusado, tabatin problema ku e eksaminadornan i tambe un grupito ku tabata probechá di e pòt di 25 mil florin tur luna.

D.F. a sigui bisa ku  normal tabata hasi 3 eksámen pa dia. Despues ku el a bini, el a sòru pa tin 7 eksámen pa dia.

El a splika mas aleu ku pa loke nan ta akus’é, di laga persona drenta di porta patras ta algu ku el a bin haña.

Esaki no tabata nifiká nada robes na su opinion. Segun e akusado ta trata di personanan ku no ke para den rei di kual e tabata sòru pa nan haña e chèns di pasa dilanti e otro hendenan.

El a bisa ku ta hopi polis, polítiko, ministernan  yu nan di empleadonan tabata pasa di porta patras di su kantor pa e yuda nan.

Fiskal a duna di konos’é ku D.F. tabata e úniko ku a ninga e akusashonnan. El a bisa den su deklarashonnan ku e otro empleadonan ta akus’é, pa motibu ku el a bin stroba e loke nan tabatin kustumber di hasi i gana plaka kuné. Ora el a bin el a tuma medida ku no a kai den bon tera serka e personanan.

Segun D.F., e empleadonan tur a plania pa deklará kontra dje. Riba esaki fiskal a duna di konos’é ku e ta di akuerdo  ku D.F. a kometé e aktonan aki den koperashon ku e otro akusadonan.

Mirando esaki fiskal a demandá D.F. na 160 ora di trabou pa komunidat i si e no kumpli 20 dia sera. E otro akusadonan na 140 i si nan no kumpli 70 dia  den prizòn. Tambe fiskal a eksigí un montante di 2500 florin di but i 3 aña fo’i aparato gubernamental pa e empleadonan públiko.

En total 136 reibeweis  a keda entregá inhustamente i 110 a wòrdu renobá ilegal. Gobièrnu a pidi un daño perhuisio di 454720 florin. Esaki ta enserá  418 mil na kostonan di e ofisina di Uitzenbureau, i e otro gastunan na kostonan di eksámen, renobashonnan di e reibeweis i esnan ku a keda entregá ilegal.

Fiskal a pidi pa honra  daño perhuisio di 36 mil florin.

Korte lo duna sentensia awe ménos di e akusado D.F. mirando ku e tin mas akusashon den su kontra. D.F. su sentensia lo ta dia 29 próksimo.