WILLEMSTAD.- Bosero di polis Maurits Rosalina a splika Extra ku debí na e kandela den Riffort Village awe mainta a hasi investigashon den e área. Esaki ta nifiká ku Riffort Village a keda sera parti di mainta.
Rosalina awe mainta no por a duna mas detaye tokante e kousa di e kandela. “Polis a haña notikashon, mesora nos a informá brantwer. Ku a bin fo’i Mundu Nobo, Rio Canario i Steenrijk. Nan a hasi un hopi bon trabou pa dominá e kandela i ku esaki limitá mas daño posibel.”

Rosalina ta splika ku tòg e daño ta konsiderabel. “Diferente unidat ku ta ubiká den e riffort a haña daño dor di kandela, awa òf huma. Servisio tékniko forensiko lo hasi hopi investigashon. Pa e motibu e área a keda sera awe mainta. Mester inspekshoná kon ‘safe’ e situashon ta promé ku nos ta habri e tarea bek.”