WILLEMSTAD - Djabièrnè 18 di desèmber 2020 e tim multidisiplinario a realisá diferente kontrol riba nos isla. Durante di kontrol na un establesimentu den área di Piscadera a konstatá ku esaki no tabatin pèrmit i e klientenan presente, alrededor di 100 persona, tabata konsumiendo alkohòl na e sitio.  En bista di e sirkunstansianan presente na e momentu ei, entre kua e kantidat di hende na e sitio, e infrastruktura di e lokalidat i e kapasidat di e tim di kontrol, tabata difísil pa aktua di forma represivo kontra di e klientenan. E doño si a risibí un prosès verbal i a sera e negoshi inmediatamente.  Ademas a kontrolá ocho (8) otro establesimentu, di kua a sera sinku (5) i a duna kuater (4) doño di negoshi un prosès verbal. Un komersiante a risibí atvertensia. E infrakshonnan tabata entre otro benta di alkohòl na e sitio i operá un negoshi sin pèrmit. E kontrolnan aki ta kontinuá.