WILLEMSTAD.- Nos a drenta temporada di kuaresma, temporada di hopi bientu i alabes temporada pa subi fli. I manera nos por spera, mester keda kòrda riba e peliger ku fli por tin pa nos aviashon i pa wayanan di koriente. I den e kuadro aki polis ta alertá pa subimentu di fli den área di airopuerto.

Polis ta informá ku ta ku sierto regularidat Sentral di Polis ta risibiendo último dianan notifikashon di flinan ku ta wòrdu subí na alturanan eksageradamente haltu den área di aeropuerto.

E situashon aki ta unu ku kada aña di nobo polis ta hala atenshon di siudadanonan i partikularmente hóbennan riba dje, pero e ta keda tuma lugá.

Subimentu di fli den área di aeropuerto ta sòru pa difikultat i por peligrá trafikashon aéreo na momentu ku un avion ta aserkando pista di aterisahe òf nèt na momentu ku un aeroplano a kaba di lanta buelo.

Un bia mas polis ke alertá ku konforme artíkulo 41 insiso 2 bou di ‘a’ di e ordenansa ku ta regla òrdu públiko (L.O.O.), no ta permití pa subi fli riba un distansia di ménos ku 3 kilometer for di e waya di tereno di aeropuerto.

Tampoko segun e lei aki, bou di respektivamente c i d di e mesun artíkulo 41 insiso 2, ta permití pa subi òf tin un fli den laira durante di bahada i subida di solo i di kua e liña ku ta fir e fli kuné, ta mas largu ku 100 meter.