Ponementu fever riba Schottegatweg na altura Saliña

WILLEMSTAD.-Vários ta e siudadanonan ku a keda pegá den área di Saliña sin por a sigui nan destino den e mardugá di djasabra pa djadumingu. Pa ser eksakto na e krusada riba Schottegatweg na altura di e lusnan di tráfiko pegá ku e restorantnan di KFC/McD. Tin outonan ku a stashoná di un forma riba e kaminda pa asina stroba pasashi di tur otro vehíkulo. Ponementu di fever pa basta ratu a opstakulisá tráfiko banda di e echo ku e peliger ku esaki ta kousa pa tur esnan ku ta para einan.

EXTRA a papia ku bosero polisial sr. Rosalina kende a bisa ku polis ta keda mantene e lucha kontra ilegalidat. Mantenshon di órden publiko ta keda un aspekto importante. Kuerpo polisial ta bai wak e imágennan di video i no keda straño ku komunidat lo tende ku a konfiská vehíkulonan i tambe detené esnan responsabel.

Sr. Rosalina a bisa ku polis ta konsiente ku e aktuashon di pone fever ta destabilisa órden den e pais aki i ta perhudiká pasashi si un médiko mester a bai atendé pashènt urgente òf si otro servisionan mester ta lihé pa yega na sierto sitionan unda tin mester di nan urgente. E ponementu di fever tin atenshon di polis, ta p’esei ta bai analisá imágennan di video i komunidat lo tuma nota di akshon ku ta sigui. E bosero polisial a bisa ku no ta nesesario pa un siudadano hasi keho na polis, outoridatnan mes lo aktua.

Awe mainta na e krusada menshoná ainda por a mira e testigunan silensioso ainda fresku na e sitio.