WILLEMSTAD.- Manera outoridatnan ta konstatándo durante kontrol e último simannan aki, públiko no ta komportando nan mes manera mester ta.

Último tempu mas i mas polis a bin ta konstatá, pero tambe ta risibí vários yamada tokante di personanan ku a tuma pa kustumber, di ta aglomerá riba kamindanan públiko i tambe na playanan públiko, saka ekipo di músika for di vehíkulo pa despues kuminsá toka esaki na un volúmen hopi haltu.

Hopi bia e akto aki ta bai kompañá pa konsumo di alkohòl na gran eskala. Aparte ku e tendensia kresiente aki ta kontra di lei, e ta formando un molèster tambe pa otro siudadanonan ku ke hasi uso di playanan pa relahá i disfrutá den un esfera trankil. E mesun aktividat aki ku ta tuma lugá te den oranan lat di mardugá riba kaminda públiko òf na sitionan públiko, ta stroba e trankilidat i sosiegu di anochi di abitantenan den bisindario, pa kua unidatnan polisial mester akudí.

Kuerpo Polisial ta atvertí pa medio di e komunikado aki, ku lo bai aktua mas fuerte i dirigí kontra di e fenómeno aki den próksimo dianan. Alabes ke rekordá tur siudadano ku pa hasi kualkier otro músika ku no ta músika di fondo riba kaminda públiko of na sitionan públiko, mester di un pèrmit miéntras ku buracheria públiko ta kastigabel pa lei