WILLEMSTAD - Djasabra 12 desèmber 2020, alrededor di 20.30’or a tuma lugá un intento di asesinato na e krusada Oranjestraat/Nuyensweg riba dos turista Sürnameño.

Riba e dia en kestion e turistanan a sali for di un restorant ku ta keda den área di Penstraat, drenta nan vehíkulo un Kia Picanto blanku i kore bai den direkshon di e krusada Oranjestraat/Nuyensweg.

Na e krusada nan a mira un scooter di 3 wil (MP3) ku 3 hòmber riba dje a yega para. Un di e hòmber nan ku tabatin ku un T-shirt kòrá bistí a baha for di e scooter i a dirigí un arma di kandela riba e turistanan. Mesora e turistanan a kore ku velosidat haltu bai for di e krusada i tabata tende ku e sospechoso tabata lòs tiru for di e arma di kandela.

Na momentu ku nan a yega nan hotèl, nan a tuma nota di perforashon di bala na e porta dilanti di e vehíkulo.

Polis ta pidi kualke persona ku por a mira òf tin informashon di e kaso aki pa pasa e informashon aki pa polis na numbernan 917 òf e number anónimo 108.

Nos ta pidi komunidat nan koperashon pa asina por resolvé un kaso mas.