WILLEMSTAD.- Relashoná ku e kaso di tiramentu di morto ku a tuma lugá awe mainta den Cubaguaweg, polis ta buskando e un sospechoso. Ta trata di e hòmber Garret Orainne Garricks, nasé na Jamaica di 35 aña di edat, bibá na Julian 41.

Awe mainta, sentral di Polis a risibí informashon di un kaso di tiramentu ku a tuma lugá den Cubaguaweg. Na yegada di e promé unidat polisial na e sitio, el a topa un hòmber drumí abou ku diferente herida di bala i for di e momentu ei no tabata duna señal di bida. E hòmber aki tabata dilanti di un snèk bentá abou.

For di investigashon preliminar ku polis a realisá na e sitio, a sali na kla ku e hòmber aki lo mester tabatin interkambio di palabra ku un otro persona. Djis despues e víktima a risibí un tiru for di un arma di kandela ku konsekuensia ku el a fayesé na e sitio mes. Na yegada di polis ya e sospechoso no tabata na e sitio mas.

Kualke persona ku por tin informashon di e hòmber aki por tuma kontakto ku polis  via di e number di telefòn 917 òf 108 ku ta e number anónimo.

Polis ke atvertí ku na momentu ku koperá pa skonde un persona ku ta ser buská pa hustisia, esaki ta kastigabel pa lei.

Ban huntu ban solushoná un kaso mas.