UPDATE

E víktima ku tabata envolví den e asesinato djarason marduga 25 di aprel 2018,  na Kaya Jacob Posner, riba tereno di un establesimentu a keda identifiká komo: E hòmber Yvenel Alcindor, nasé na Haiti, 25 aprel 1978;

WILLEMSTAD - Djárason 25 di aprel 2018, alrededor di 00.40 or, Sentral di Polis a dirigí unidatnan di polis pa Kaya Jacob Posner, kaminda tin un hòmber heridá riba tereno di un establesimentu.

Patruya ku a yega na e sitio a topa en bèrdat ku un hòmber drumi riba su lomba gravemente heridá. For di investigashon preliminar ku polis a hasi na e sitio, te kaminda esaki tabata posibel i bou di e sirkunstansianan presente, por a mira ku e víktima (un bewaker di e establesimentu) tabatin herida di bala. Dòkter di polis a konstatá morto di e víktima.

E prosedura ku ta mantené na dje ta, ku ta notifiká famia via e kanal(nan) legal i ofishal promé i despues di esei por hasi e identidat di e víktima públiko.

Riba òrdu di Fiskal di Ministerio Públiko a konfiská e kurpa sin bida di e víktima pa mas investigashon.  Motibu di e asesinato ta den investigashon.

Ta supliká tur persona ku tin kualke informashon di e kaso aki, pa pasa esaki na polis via di number di telefòn 917 òf 108 (riba e number aki bo anonimidat ta garantisá)