Durante akshon grandi

WILLEMSTAD.- Manera anunsiá djabièrnè pasá, diferente di e departamentonan den kuerpo polisial a uni pa konsientisá komunidat riba ladronisia di outo. Manera por tuma nota konstantemente den publikashonnan, ladronisia di outo i tambe di piesa di outo ta sigui manera nada a pasa. Polis ta hasiendo hopi esfuerso pa solushoná esaki, pero e no ta bira posibel sin yudansa di komunidat.

I p’esei djaluna 20 di novèmber entre 5 or atardi i 10 or di anochi, polis a tene kontròl na tres sitio, ku ta Caracasbaaiweg, Gosieweg i Weg naar Westpunt.

E kontròl aki tabata mas un akshon preventivo na unda ku tantu reshèrshinan den unifòrm komo personal di U.S.T. a para prinsipalmente vehíkulonan di kua ta konosí ku mas malechornan ta hòrta.

A puntra e doño i/o shofùr di e vehíkulonan aki, si nan ta na altura ku e vehíkulonan ku nan ta manehá ta wòrdu hopi hòrtá i ku si nan a tuma e medidanan mínimo pa protehá nan outo.

Na final polis a gradisí esnan ku a koperá ku e kontròlnan i a entregá nan un foyeto ku algun rekomendashon riba dje.

E akshon aki ta parti di un kampaña ku lo bai sigui insentivá den próksimo dianan, simannan i lunanan, pa yuda baha e kantidat di ladronisia di vehíkulo.

Denter di un siman lo publiká tambe resultado di e akshon ku a tene djaluna último.