Ayera 5’or di mardugá durante entrada hudisial:

WILLEMSTAD. - Ku aresto di dos venezolano ayera mainta tempran, mester indiká ku Kuerpo Polisial ta solushonando krímennan ku ta tumando lugá aki an Kòrsou.

E investigashon profundo ku ta andando ya pa un par di tempu relashoná ku kasonan di violashon di e lei di opio, lei di arma di kandela, menasa, maltrato i intento di asesinato, ayera den oranan di 5’or di mainta personal di Divishon di Krímen Organisá den koperashon ku VVC, KMAR i Marina a tene entrada hudisial na dos diferente adrès.

E entradanan hudisial a tuma lugá na entre otro Kaya Andruw Jones i Wishi. Durante e entradanan, a  konfiská algun telefòn i un kantidat chikí di droga.

Manera ya menshoná, na e adrèsnan menshoná polis a detené dos hòmber sospechoso, den e kaso aki D.A.B.P. di 31 aña di edat i L.M.M. di 30 aña di edat, ámbos nasé na Venezuela.

A presentá e sospechosonan dilanti un fiskal ouksiliar ku a ordená nan enkarselamentu pendiente di mas investigashon.

Ku e arestonan aki por bisa ku polis a kita dos persona, te na e momentunan aki, konsiderá peligroso sigur si tuma na konsiderashon kiko ta e sospecho ku e dos persona nan aki ta keda sospechá di a hasi nan mes kulpabel na dje.