WILLEMSTAD.- Ketu bai siudadanonan ta kere di por burla di outoridatnan i medidanan di Toke de Keda ku a keda emití p’asina baha e kantidat di kasonan di corona vírus riba nos isla.

Ayera un biaha mas polis a bai parti pariba di Kòrsou, kaminda a para un fiesta i a parti 14 prosèsverbal p’esnan ku tabata den fiesta, durante di toke de keda.

Djamars anochi alrededor di 22.45’or polis a risibí informashon di un fiesta ku tabatin na Brakapoti.

Mesora a bai ku algun unidat na e sitio i a bin topa en bèrdat un kantidat di persona na e sitio ku tabata sinta di un forma ameno disfrutando, miéntras ku tabatin muzik duru ta toka.

Polis a para e fiesta aki, i a partí 14 prosèsverbal pa e personanan ku tabata huntu

den e ambiente festivo.

Despues a kita tur hende for di e sitio aki.

Polis ta keda alerta den próksimo dianan pa tipo di aktividatnan asin’aki kontra reglanan vigente i lo sigui aktua di forma represivo, repartiendo but na esnan ku ta den violashon.

Ta bon pa tene kuenta ku no solamente e organisadó lo wòrdu sanshoná, pero tambe tur esnan ku ta presente na e aktividat.

Den e kaso aki, ta alrededor di14.000 florin ta bai den kaha di Ministerio Públiko. e kobransa di e butnan aki lo bai meskos ku butnan di den tráfiko, kaminda e hende tin di pasa na Ofisina di Paga bo But di OM na Waaigat. Esun ku keda sin paga nan but, por bai korte, kaminda e chèns pa e but oumentá ta hopi grandi.