WILLEMSTAD.- Hues durante un kaso di infrakshon di tráfiko, a papia basta severo ku un hóben ku ainda no a yega e edat di tin reibeweis.
Esaki pa motibu ku polis a gar’é pa di 2 bia ta kore outo sin reibeweis.
Durante tratamentu di e kaso e hóben a presentá ku su mama den sala di korte.
Esaki pa motibu ku e ta menor di edat i e outo ku e tabata kore ta di su mama.
Hues basta indigná a puntra e hóben dikon e ta kore outo sin reibeweis i si e sa e konsekuensianan si algu pasa.
E hóben a bisa ku e no sa presis.
Mirando esaki, hues a splik’é ku si e sigui kore outo sin reibeweis e próksimo bia e lo keda detené pa motibu ku e loke e ta hasi no ta kuadra ku lei i por kost’é su libertat.
Hues a splik’é tambe, ku e loke e ta hasi ta sumamente peligroso i si ku e okashoná kualke aksidente, por resultá e i su famia hopi malu pasó seguro no ta paga.
Tambe hues a sigui splika e hóben ku no ta pòrnada mester pasa lès pa haña reibeweis.
E hóben a splika ku e dia ei el a kue outo di su mama pa bai tuma algu serka un amigu, ku no ta biba muchu leu fo’i kas.
Ora e tabata bayendo kas bèk, el a topa polis ku a par’é pa hasi kontròl.
Mama di e hóben a bisa ku su yu a kue e yabi i bai ku e vehíkulo sin ku e tabata sa.
Fiskal a splika ku e hóben tin un montante di but habrí.
Fiskal a bisa ku no ta normal ku un hóben di e edat ei ya kaba tin but habrí pa kore outo sin reibeweis.
Mirando esaki fiskal ta yega na un kastigu di 40 ora kondishonal di trabou pa komunidat pa e hóben i dos aña di prueba.
Hues na final a atvertí e hóben ku si e bolbe keda gará pa kore outo sin reibeweis e lo keda detené inmediatamente.
Na final hues a bai di akuerdo ku e demanda di fiskal.