Kuerpo Polisial Kòrsou ta hasi un apelashon na komunidat, pa ken ku sa paradero di e hòmber hulandes Daniel Dresden òf a señal’é na un òf otro sitio, pa tuma kontakto ku polis mesora na e number di emergensia 911 òf 917.
Daniel Dresden ta nasé dia 13 aprel 1977 na Leiden (Hulanda) i tin un estatura di 1.92m
Ta trata di e turista hulandes ku ta na Kòrsou di bishita i ku for di den oranan lat di mainta di djamars 26 di yüli 2022 e no a regresá for di un paseo ku el a bai hasi den mondi.
A kuminsá ku un búskeda den e área, kanando e trayekto ku normalmente e sa kana, pero sin e resultado deseá.
Durante di e búskeda mas lat den dia i ku a sigui te den oranan di mardugá di e siguiente dia, miembronan di diferente organisashon a partisipá.
Djárason a sigui eskala ku personal i alabes a amplia e teritorio na unda tabata buska te den parke di kristòf, ku e fin pa logra lokalisá e turista aki.
Tur dia e búskeda tabata intensivo i a hasi uso di personanan ku tin bon konosementu di e mondi aki, pa asina por a buska mas strukturá i dirigí.
Miéntras tantu ta sigui ekspandé e área di búskeda na Banda Bou i lo bai konsentrá próksimamente den áreanan di Santa Cruz i Kenepa.